मायादेवी अनलाइन, बाणगंगा ।
कपिलवस्तु बाणगंगा नगरको हिउँदे नगरसभाले रातो किताबमा समावेश १ करोड ५० लाखका योजनालाई हेरफेर गरेको छ ।
नगरको १२ औं तथा हिउँदे नगर सभाले चालु आवमा भएका आम्दानी तथा खर्चको विवरण तुलना गर्दै केही योजना थपघट गर्दै बजेटलाई हेरफेर गरेको हो ।
‘नगरसभाले पुराना योजनाको केही संसोधन र राजश्वमा आएको वृद्धि अनुरुप नयाँ प्रस्तावित योजनाहरु स्वीकृत गरेको छ’, नगर प्रवक्ता विष्णु पौडेलले भने ।
नगरका ११ वटै वडामा करिब १ करोड ५० लाख बराबरको योजना थपघट गरिएको वडा नं २ का वडा अध्यक्ष समेत रहेका प्रवक्ता पौडेलले बताए ।
चालु आवमा प्राय सबै योजना कार्यान्यनमा गएकाले धेरै शिर्षक यथावत नै राखेर जाने गरि केही मात्र शिर्षक संशोधन गरिएको मेयर चक्रपाणी अर्यालले बताए ।
नगर सभामा बोल्दै मेयर अर्यालले नगरसभा सदस्यले राखेका विभिन्न प्रश्न तथा जिज्ञासाको संवोधन गर्दै बाणगंगालाई समृद्ध र शुसासनयुक्त नगर बनाएर लैजान अबको सम्पूर्ण समय नगर विकासमा खर्च गर्न सबैलाई आग्रह गरे ।
उप-मेयर रिता कुमारी थारुले बाणगंगाको बिकासमा कुनै पनि प्रकारको विभेद र राजनैतिक पूर्वाग्रह नराख्ने संस्कार संस्थागत भएको भन्दै यसलाई अझ बढाउन सबैमा आग्रह गरिन् ।
प्रमुख प्रशासकीय अधिकृत खिमानन्द भूसालले आफू यसपालीको नगर सभामा सहभागी भएर हेर्दा यहाँका जनप्रतिनिधिको स्तर धेरै माथिको रहेको पाएको बताए ।
प्रतिक्रिया