स्थापना दिवसमा पत्रकार महासंघ कपिलवस्तुद्धारा बिरामीलाई फलफूल वितरण

मायादेवी अनलाइन, बहादुरगंज ।

नेपाल पत्रकार महासंघ कपिलवस्तु शाखाले स्थापना दिवसको अवसरमा बिरामीलाई फलफूल वितरण गरेको छ।

महासंघको २३औँ स्थापना दिवसको अवसरमा बिहीबार शिवराज अस्पताल बहादुरगंजमा उपचाररत बिरामीहरूलाई फलफूल वितरण गरिएको हो।

महासंघका अध्यक्ष डिलाराम भुसालले स्थापना दिवसको अवसरमा हरेक वर्ष सामाजिक उत्तरदायित्वअन्तर्गतका कार्यक्रम गर्दै आएको र यस वर्ष पनि सोही अनुरूप बिरामीलाई फलफूल वितरण गरेर दिवस मनाइएको जानकारी दिनुभयो।

उहाँले शिवराज अस्पतालबाट बिरामीहरूले गुणस्तरीय सेवा पाउनुपर्नेमा जोड दिँदै सेवा प्रवाहमा कुनै समस्या भएमा सञ्चार माध्यममार्फत विषय उठान गरिने बताउनुभयो। साथै उहाँले विश्वसनीय र प्रभावकारी सेवा प्रवाह गर्न अस्पताल प्रशासनलाई आग्रह गर्नुभयो।

कार्यक्रममा नेपाल पत्रकार महासंघका पूर्व अध्यक्षद्वय मनोज पौडेल र किरणमान बज्राचार्य, अस्पतालका चिकित्सक तथा जिल्लाका सञ्चारकर्मीहरूको उपस्थिति रहेको थियो।