रुकुम पूर्वमा १० दिन निषेधाज्ञा थप

रुकुम ।
रुकुम (पूर्व)मा निषेधाज्ञाको अवधि पुनः १० दिन थपिएको छ । जिल्ला कोभिड–१९ व्यवस्थापन केन्द्र (डिसिएमसी)को बैठकको निर्णय अनुसार जिल्ला प्रशासन कार्यालयले पुनः १० दिनसम्म निषेधाज्ञालाई थप गरेको हो ।

जसअनुसार अब भदौ १० गते राति १२ बजेसम्म जिल्लाभर निषेधाज्ञा जारी रहने प्रमुख जिल्ला अधिकारी लक्ष्मीप्रसाद बास्कोटाले जानकारी दिए । उनका अनुसार यसअधि यही साउन २५ गतेदेखि ३२ गते सम्म जिल्लामा निषेधाज्ञा थियो ।

कोरोना संक्रमणको जोखिम केही कम भए पनि पूर्णरुपमा नियन्त्रण नभएको र दैनिकजसो संक्रमितहरु भेटिरहेकाले निषेधाज्ञाको अवधि बढाइएको प्रजिअ बास्कोटाको भनाइ छ ।

जिल्लामा गत बैशाख २१ गतेदेखि निषेधाज्ञा जारी छ । सुरुमा कडाई गरिएको निषेधाज्ञामा अहिले केही खुकुलो बनाइएको छ ।