काठमाडौँ ।
नेपाली सेनाले देशभरका विभिन्न तालिम केन्द्र तथा युनिटहरूमा सञ्चालन गरिएको ९ महिनाको सैन्य आधार तालिम शुक्रबार समापन गरेको छ ।
तालिम समापनका अवसरमा आयोजित कार्यक्रमहरूमा सहभागी नयाँ सैन्यहरूले अनुशासन र तालिममा देखाएको दक्षताको प्रदर्शन स्वरूप अन्तिम दलेल कवाज गरेका थिए ।
सेनाका अनुसार, कुल १९ स्थानमा सञ्चालन गरिएको उक्त तालिमबाट २,५६४ जना पुरुष र ३८७ जना महिला गरी कुल २,९५१ जना जवानहरू दीक्षित भएका छन्। तालिम समापन कार्यक्रमहरू विभिन्न स्थानमा छुट्टाछुट्टै ढङ्गले आयोजना गरिएको थियो ।
त्रिशूलीस्थित श्री नम्बर १ सैन्य तालिम केन्द्रमा आयोजित कवाज कार्यक्रममा बलाधिकृत रथी निर्मल कुमार थापाले निरीक्षण गरे भने सैनामैनास्थित नम्बर २ सैन्य तालिम केन्द्रमा सैनिक तालिम महानिर्देशक रथी ध्रुव प्रकाश शाहको प्रमुख आतिथ्य रहेको थियो।साथै, देशभरका विभिन्न पृतना, बाहिनी, गण तथा गुल्महरूमा तालिम समापन समारोहमा सम्बन्धित पृतनापति, वाहिनीपति लगायतका ज्येष्ठ अधिकृतहरूले उपस्थिति जनाएका थिए ।
समारोहमा उत्कृष्ट प्रदर्शन गर्ने शिक्षार्थीहरूलाई पुरस्कार प्रदान गरिएको सेनाले जनाएको छ ।
प्रतिक्रिया