पिपरास्थित राधाकृष्ण मन्दिरमा भक्तजनको घुइँचो, दिनभर भजन कृतन

कपिलवस्तु ।
आज देशभर भगवान् श्रीकृष्णको जन्मोत्सव ‘श्रीकृष्ण जन्माष्टमी’ भक्तिभावपूर्वक पूजाआराधना गरी मनाइँदैछ । यसै अवसरमा कपिलवस्तुको वाणगङ्गा–२ पिपरा स्थित श्रीराधाकृष्ण मन्दिरमा बिहानैदेखि भक्तजनको घुइँचो लागेको छ।

भक्तजनहरूले जल, फूल र प्रसादसहित मन्दिरमा पुजा–आराधना गर्दै दर्शन गरेका छन्। मन्दिर व्यवस्थापन समितिले सहज पूजाआजाका लागि विशेष व्यवस्था मिलाएको छ भने स्वयंसेवक समूह परिचालन गरी दर्शनार्थीलाई सहजता दिलाइएको छ। समितिले भक्तजनका लागि प्रसाद तथा सर्वतको व्यवस्थासमेत गरिएकाे राधाकृष्ण मन्दिर व्यवस्थापन समितिका अध्यक्ष विष्णु प्रसाद अधिकारीले जानकारी दिनुभयो ।

मन्दिर परिसरमा दिनभर भजन–कीर्तनको कार्यक्रम चलिरहेको छ। भजन–कीर्तन समूहका संयोजक डिल्लीराज खनालले आज दिनभर श्रीकृष्णको पूजा–आराधना, वेदपाठ, भजन–कीर्तनमार्फत भक्तिभाव प्रकट गर्ने व्यवस्था मिलाइएको जानकारी दिनुभयो। साथै विभिन्न संघसंस्था, समूह र श्रद्धालुहरूले मन्दिरलाई दान तथा आर्थिक सहयोग गरेका छन्।

यसैबीच संस्कृति संरक्षण, हाम्रो अभियान भन्ने मूल नारासहित रोटरी क्लब अफ कपिलवस्तु मिड टाउनले श्रीराधाकृष्ण मन्दिरलाई ११ हजार ५ सय ३५ रुपैयाँ नगद सहयोग गर्दै भक्तिभाव प्रकट गरेको छ।

धर्मशास्त्रअनुसार द्वापरयुगमा भाद्र कृष्ण अष्टमीको मध्यरातमा भगवान् श्रीकृष्णको जन्म भएकाले यो दिनलाई ‘श्रीकृष्ण जन्माष्टमी’ र रातलाई ‘मोहरात्रि’ भनिन्छ। यस अवसरमा देशभरका कृष्णमन्दिरमा पूजाआजा, प्रवचन, भजन–कीर्तन हुँदै विशेषगरी महिला–पुरुषले व्रत बसेर रातभर जाग्राम गर्ने परम्परा छ।

पाटनको प्रसिद्ध मङ्गलबजारस्थित कृष्णमन्दिरमा बिहानैदेखि मेला लागेको छ भने पशुपति क्षेत्र, वसन्तपुर दरबार क्षेत्रसहित देशभरका कृष्णमन्दिरमा भक्तजनको भीड लागेको छ।

यस दिन विभिन्न धार्मिक सङ्घ–संस्थाले श्रीकृष्णको झाँकीसहित शोभायात्रा र रथयात्रा निकाल्ने परम्परा रहेको छ। अष्टमीको मध्यरातमा जन्मोत्सव मनाइए पनि भाद्र कृष्ण नवमीका दिन रथयात्रा गर्ने चलन रहेको नेपाल पञ्चाङ्ग निर्णायक विकास समितिका पूर्वअध्यक्ष प्रा. डा. रामचन्द्र गौतमले जानकारी दिनुभयो।