११ फाल्गुन २०८०, शुक्रबार | Fri Feb 23 2024

१३ औं कपिलवस्तु महोत्सवको ७० प्रतिशत तयारी सकियो : महासचिव पौडेल



मायादेवी अनलाइन, जितपुर ।

१३ औं कपिलवस्तु महोत्सवको तयारी करिब ७० प्रतिशत पुरा भएको छ ।

यही माघ १७ गतेदेखि २९ गतेसम्म १३ औं कपिलवस्तु महोत्सव एवम् कृषि, पर्यटन तथा औद्योगिक प्रदर्शनी हुन लागेको हो । महोत्सवको करिब ७० प्रतिशत काम भईसकेको कपिलवस्तु उद्योग बाणिज्य संघका महासचिव मनोज पौडेलले जानकारी दिए । विभिन्न समिति, उपसमितिमार्फत महोत्सवको तयारी तीब्र भईरहेको बताउँदै उनले भने, ‘फिल्डमा देखिने गरि ७० प्रतिशत काम सम्पन्न गरिसकेका छौं । कम्पाउण्ड निर्माणको काम भईसक्यो ।’

महोत्सवमा २ लाख दर्शक भित्राउँदै करिब ५ देखि ७ करोडको आर्थिक कारोबार गर्ने लक्ष्य रहेको उनले बताए ।

स्टल, मञ्च र सचिवालय निर्माणको काम अन्तिम चरणमा रहेको उनले बताए । महोत्सवको प्रवेश गेट निर्माणको काम धमाधम भईरहेको र निर्धारित मितिमै उद्घाटन गर्ने गरि काम सम्पन्न गर्ने उनले दाबी गरे ।

विगतका बर्षहरुमा कपिलवस्तु महोत्सव अन्य क्षेत्रका महोत्सव भन्दा फरक रहदैं आएको बताउँदै उनले भने, ‘यस अघिको महोत्सव पृथक बनाउने प्रयास गर्दा कोरोनाले प्रभावित बनायो । अहिले पनि केही न केही प्रभाव रहेकै छ ।’

कोरोनाका कारण समस्यामा परेको आर्थिक क्षेत्र, उद्यमी व्यवसायी र आम सर्वसाधारणलाई आर्थिक पुनरुत्थानको आयामको रुपमा महोत्सवलाई लिन सकिने उनको भनाई छ ।

‘अर्थतन्त्रलाई चलायमान गराउँन महोत्सवले टेवा पुग्ने छ,’ उनले भने, ‘उद्योग, व्यवसायको प्रवद्र्धन गर्दै उद्योगी व्यवसायीलाई केही राहत दिलाउने उद्देश्य छ ।

महोत्सवमा यस क्षेत्रका पर्यटकीय गन्तव्यको प्रचारप्रसार गर्दै कपिलवस्तुको व्यवसायलाई प्रतिबिम्बित गरिने उनले बताए । उनले हस्तकलाको प्रदर्शनसंगै शैक्षिक प्रदर्शनी र कृषि प्रदर्शनी समेत हुने बताए ।

विगतका महोत्सवमा रहदै आएका विभिन्न खानाका परिकार, बालउद्यान जस्ता गतिविधिलाई निरन्तरता दिने उनले बताए ।

महोत्सवको मुख्य आकर्षणको रुपमा रहदै आएको कपिलवस्तु डान्स आईडललाई निरन्तरता दिने अथवा अन्य आईडल गर्ने भन्ने बारे छलफल भईरहेको उनले बताए ।

“सक्षम व्यवसायी, समुन्नत राष्ट्र र आत्मनिर्भर अर्थतन्त्र” भन्ने मूल नाराका साथ १३ औं कपिलवस्तु महोत्सव बाणगंगा ४ मा रहेको बुद्धरंगशालामा हुदैं छ ।

प्रकाशित मिति : ६ माघ २०७९ शुक्रबार ००:००  ५ : ३० बजे