ओली नै प्रधानमन्त्री हुनुपर्छ भन्दै कपिलवस्तुमा प्रर्दशन

मायादेवी अनलाइन, चार नम्बर
प्रधानमन्त्री केपि शर्मा ओलीको पार्टीभित्र चर्को आलोचना भैरहेका बेला उनी पक्षिय समर्थकले त्यसको विरोधमा प्रर्दशन गर्न थालेका छन् । जारी स्थायी समितिको बैठकमा ओलीलाई पार्टी अध्यक्ष र प्रधानमन्त्री दुवै पदबाट राजीनामा दिन नेताहरुले चर्को दबाब दिएका छन् ।

तर, उनी पक्षिय कार्यकर्ताले ओलीलाई नै सरकारमा निरन्तरता दिनुपर्ने माग गर्दै कपिलवस्तुमा पनि प्रर्दशन गरेका छन् ।

शुक्रबार जिल्लाको वाणगंगा चारनम्बर चोकमा ओली पक्षिय समर्थकले प्रर्दशन गरेका हुन् । ५ वर्षको स्थायी सरकारको लागि भनेर मतदान गरिएकाले अहिले नै ओलीलाई प्रधानमन्त्रीको पदबाट हटाउन नहुने उनीको माग थियो ।

नाराबाजीमा सहभागी भएकाहरूले वर्तमान सरकारलाई अस्थिर बनाउन भारतको इसारामा नेपालकै नेताहरू लागिपरेको आरोप लगाउँदै भारतबाट चलेकाहरूले व्यक्तिगत स्वार्थ पूरा गर्न कुर्सीको लडाइँमा लागेको दाबी गरेका छन् ।

ओलीका समर्थकहरूले ‘केपी ओली जिन्दाबाद’, ‘आजलाई होइन भोलिलाई, ५ वर्ष ओलीलाई’, ‘स्थायी सरकार कायम गर’, ‘भारतीय दलाल मूर्दावाद’, ‘विदेशी हस्तक्षेप मुर्दावाद’, पार्टी स्थिरता कायम गर, लिम्पियाधुरा हाम्रो हो लगायतका नाराहरू लगाएका थिए ।