सहकारीको विकासविना नगर विकास हुँदैन, अब मर्ज हुन्छन्ः मेयर थारु

मायादेवी अनलाइन, चार नम्बर ।

कपिलवस्तुको बाणगंगा नगरपालिकाका मेयर मंगलप्रसाद थारुले सहकारीहरुको विकासविना नगरपालिकाको विकास हुन नसक्ने बताउनु भएको छ ।

मुलुकमा सहकारीका कारण बिभिन्न आर्थिक, सामाजिक र विकास निर्माणका बिभिन्न कामहरु भइरहेको भन्दै नगर विकास गर्न पनि यहाँका सहकारीहरु समृद्ध र बलियो हुनै पर्ने उहाँले बताउनु भयो ।

वडा नम्बर ४ स्थित लालीगुराँस बचत तथा क्रण सहकारीको १४ औँ बार्षिक साधारण सभालाई सम्बोधन गर्दै उहाँले भन्नुभयो–‘अब नगरका सहकारीको विकास हुनै पर्दछ । सहकारी उचित तरिकाले फस्टाएनन् भने नगरको विकास नै हुँदैन । त्यसैले जनप्रतिनिधि पनि यस विषयमा एकमत छन् ।’

अब नगरका सहकारीमा मर्जर प्रकृया सुरु हुन लागेकाले एक सहकारी रोज्नु पर्ने स्थितिमा हेक्का राख्न पनि सहकारीकर्मीहरुलाई उहाँले आग्रह गर्नुभयो । मर्जर प्रकृयामा जाँदा अग्रणी भएर जान पनि लालीगुराँसलाई मेयर थारुले आग्रह गर्नुभयो ।

कार्यक्रममा वडा नम्बर ४ का वडाध्यक्ष गणेश बहादुर क्षेत्रीले पनि नगरमा सहकारी मर्जर प्रकया भएरै छाड्ने बताउनु भयो ।उत्पादनमूलक क्षेत्रमा लगानी नगरेसम्म अब सहकारीहरु अगाडी बढ्न नसक्ने उहाँको भनाई छ ।

अध्यक्ष शालिकराम भुषालको अध्यक्षतामा सम्पन्न साधारण सभामा सहकारीका पूर्व अध्यक्ष एवं नेपाल किसान ट्याक्टर समितिका अध्यक्ष शंकर पौडेल, पूर्वअध्यक्षहरु कृष्णराज अर्याल, मधु अर्याल, टेक बहादुर शाही लगायतले बोल्नु भएको थियो ।

कार्यक्रमकै सन्दर्भमा उत्कृष्ट बाल बचतकर्ता, असल रिणी, असल कृषक, एसईईमा उत्कृष्ट अंक ल्याउने शेयर धनीका छोराछोरी लगायतलाई सम्मान गरिएको थियो ।

सहकारीमा ५ सय ५१ सदस्य छन् भने अहिलेसम्म गत आर्थिक बर्षमा ७२ लाख ७७ हजार ७ सय १८ रुपैयाँ आम्दानी गर्न सफल रहेको अध्यक्ष भुषालले बार्षिक प्रतिवेदनमार्फत् जानकारी गराउनु भएको थियो ।

सचिव शालिकराम आचार्यले सहकारीमा भएका महत्वपूर्ण निर्णहरु सुनाउनु भएको थियो । यस्तै कोषाध्यक्ष उमा रोस्कोटीले कोषाध्यक्षको प्रतिवेदन र लेखा समिति संयोजक नमुना पौडेलले लेखा प्रतिवेदन प्रस्तुत गर्नुभएको थियो । साधारण सभामा सदस्यहरुले बिभिन्न जिज्ञासा राखेका थिए ।सदस्यहरुले छोटो समयमा सहकारीले राम्रै फड्को मारेकोमा खुसी पनि ब्यक्त गरेका छन् ।