दीपा महत, वाणगंगा ।
लोकतान्त्रिक समाजवादी पार्टी (लोसपा) कपिलवस्तुको साख कमलेश शरण चौधरीले जोगाएका छन् ।
महन्थ ठाकुर नेतृत्वमा रहेको लोसपा जिल्लामा कमजोर नै छ । ठाकुरकै नेतृत्वमा गठन भएको तत्कालिन तराई मधेस लोकतान्त्रिक पार्टी (तमलोपा) कुनै बेला जिल्लामा शक्तिशाली थियो ।
०६४ सालको पहिलो संविधानसभाको निर्वाचनमा तत्कालिन तमलोपाले जिल्लाका ५ निर्वाचन क्षेत्र मध्ये ३ क्षेत्रमा विजयी हासिल गरेको थियो ।
जिल्लाका चर्चित नेताहरु वृजेश कुमार गुप्ता, दान बहादुर चौधरी, विरेन्द्र मिश्रा लगायत ०६४ सालका तमलोपाबाट निर्वाचित संविधानसभा सदस्य हुन् ।
यी नेताहरु अहिले ठाकुर नेतृत्वको पार्टीमा छैनन् । दान बहादुर चौधरी पछिल्लो समय नयाँ शक्ति हुँदै जनता समाजवादी पार्टी, नेपाल (जसपा)मा सक्रिय छन् भने, वृजेश कुमार गुप्ता एमालेमा प्रवेश गरेका छन् ।
विरेन्द्र मिश्रा भने जनता प्रगतिशिल पार्टीका महासचिव भएर काम गरिरहेका छन् ।
ठूला नेताहरु लाखपाखा लाग्दा जिल्लामा मधेस केन्द्रीत दलको वर्चश्व गुम्दै गएको छन् । तत्कालिन बेला राजेन्द्र महतोले नेतृत्व गर्ने सद्भावना पार्टी अहिले राजपा हुँदै लोसपा छ । सद्भावना पार्टीमा लामो समय देखि राजनीति गर्दै आएका जिल्लाका पुराना नेता रविदत्त मिश्रा (राजु) मात्र महन्थ ठाकुरको पार्टीमा सिनियर नेताका रुपमा जिल्लामा क्रियाशिल छन् ।
०७४ सालमा तत्कालिन बेलाको राष्ट्रिय जनता पार्टी (राजपा) ले दोस्रो चरणको निर्वाचन बहिस्कार गरेको थियो । संविधान निर्माणको सन्दर्भमा विमति जनाउँदै सडक संघर्षमा रहेको राजपाले दोस्रो चरणमा सम्पन्न स्थानीय तह निर्वाचन बहिस्कार गरे देखि कपिलवस्तुमा यसको लिगेसी कमजोर बनेको हो ।
चुनाव बहिस्कार कै कारण वृजेश कुमार गुप्ता, निसार अहमद खाँ लगायतका नेताहरुले राजपा त्यागे । राजपा त्यागे पछि निसार शुद्धोधन गाउँपालिकाको अध्यक्षमा स्वतन्त्र उम्मेद्वार बने भने, गुप्ताले आफु पक्षिय नेताहरुलाई स्वतन्त्र रुपमा निर्वाचनमा उठाए ।
०७४ को स्थानीय तहको चुनावबाट कमजोर बन्दै गएको राजपाको धार लोसपा बन्दै गर्दा झनै कमजोर बनेको हो ।
कमजोर बनेकै परिस्थितिमा उठ्दै गरेको लोसपाले गएको बैशाख ३० गते सम्पन्न स्थानीय तहको निर्वाचनमा शुद्धोधन गाउँपालिकाको अध्यक्ष जित्दै गुमेको साख फर्काउन सफल भएको छ ।
निर्वाचन बहिस्कारका कारण ०७४ मा स्थानीय तहमा शून्य रहेको लोसपाको यो धार हालैको निर्वाचनमा भने उठेको छ । शुद्धोधन गाउँपालिकाको अध्यक्ष जित्दै लोसपाका कमलेश शरण चौधरीले पार्टीको साख बचाएका हुन् ।
६ वडा रहेको शुद्धोधनमा कुनै पनि वडा लोसपाले जित्न सकेन् । यद्यपि चौधरीले पालिका अध्यक्ष जित्न सफल रहे ।
चौधरीले जसपाका निसार अहमद खाँलाई पराजित गरेका हुन् । निवर्तमान पालिका अध्यक्ष समेत रहेका खाँ चौधरी संग २ सय ९९ मतले पराजित भए ।
चौधरीले ४ हजार ४ सय ८१ मत पाएका निर्वाचित हुँदा खाँले ४ हजार १ सय ८२ मत पाए ।
१० पालिका मध्ये शुद्धोधनमा अध्यक्ष जितेको लोसपाले शिवराज नगरपालिकामा आफ्नो उपस्थिति बलियो पारेको छ ।
शिवराजको मेयरमा उम्मेद्वार रहेका लोसपाका केन्द्रीय नेता समेत रहेका रविदत्त मिश्रा (राजु) ले ४ हजार २४ मत पाएर चौथो भए ।
९६ वडा रहेको जिल्लामा लोसपाले शिवराज नगरपालिकामा २ र महाराजगञ्ज नगरपालिकामा १ गरि ३ वडा जितेको छ ।
८ पालिकामा लोसपाका उम्मेद्वारले खासै मत पाउँन सकेका छैनन् ।
यो पनि पढ्नुहोस्
कपिलवस्तुमा डेढ दशक भित्रै कमजोर बनेको मधेस केन्द्रित दलको शक्ति
प्रतिक्रिया