लामो खडेरीले कृषि क्षेत्र प्रभावित, लुम्बिनीमा हुन सकेन् पर्याप्त रोपाइँ

बुटवल ।
असार पहिलो सातासम्मको खडेरीले गर्दा लुम्बिनी प्रदेशमा पर्याप्त रोपाइँ हुन सकेको छैन । साउन २ गतेसम्म लुम्बिनीमा ६५ प्रतिशत मात्रै धान रोपाइँ सकिएको छ । यसपटकको लामो खडेरीले कृषि क्षेत्र प्रभावित भएको छ ।

कृषि विकास निर्देशनालयका सूचना अधिकारी एवं कृषि अर्थ विज्ञ डिल्लीराज पौडेलले लुम्बिनी प्रदेशमा ६४।९ प्रतिशत मात्रै रोपाइँ सकिएको जानकारी दिए । समयमै पानी नपरेपछि प्रदेशका अधिकांश भूभागका किसानले ढिलोगरी रोपाइँ शुरु गरेको उनले बताए ।

लुम्बिनीमा धान रोपाइँ हुने ३ लाख ११ हजार ४२ हेक्टर क्षेत्रफल मध्ये अहिलेसम्म १ लाख ९९ हजार ३४६ हेक्टर क्षेत्रफलमा मात्रै रोपाइँ सकिएको छ ।

क्षेत्रफलका हिसाबले प्रदेशमा सबैभन्दा धेरै धान खेती कपिलवस्तु र सबैभन्दा कम रुकुमपूर्वमा हुने गरेको छ । लुम्बिनीमा असार २९ गतेसम्म सबैभन्दा धेरै प्यूठानमा रोपाइँ भएको कृषि विकास निर्देशनालयका सूचना अधिकारी पौडेलले बताए ।

कहाँ कति भयो रोपाइँ रु

नवलपरासी पश्चिममा धान रोपाइँ हुने २० हजार ५ सय हेक्टर क्षेत्रफलमध्ये १४ हजार ३५० हेक्टर अर्थात् ७० प्रतिशत रोपाइँ भएको छ । रुपन्देहीमा धान उत्पादन हुने ६३ हजार ४९७ हेक्टर क्षेत्रफलमध्ये ४७ हजार ६२३ हेक्टर अर्थात् ७५ प्रतिशत रोपाइँ सकिएको छ । कपिलवस्तुमा धान उत्पादन हुने ७० हजार ७० हेक्टर क्षेत्रफलमध्ये ४५ हजार ५४६ हेक्टर अर्थात् ६५ प्रतिशत रोपाइँ सकिएको छ ।

त्यस्तै, पाल्पामा ८ हजार २ सय १० हेक्टर क्षेत्रफलमध्ये ६ हजार ५६८ हेक्टर अर्थात् ८० प्रतिशत रोपाइँ सकिएको छ । गुल्मीमा धान उत्पादन हुने ८ हजार ६७० हेक्टर क्षेत्रफलमध्ये ५ हजार २०९ हेक्टर अर्थात् ६० प्रतिशत रोपाइँ सकिएको छ । अर्घाखाँचीमा ८ हजार ५० हेक्टर क्षेत्रफलमध्ये ५ हजार ६३५ हेक्टर क्षेत्रफलमा रोपाइँ सकिएको निर्देशनालयका सूचना अधिकारी पौडेलले बताए ।

त्यस्तै, दाङमा कुल धान उत्पादन हुने ३७ हजार ४ सय ३० हेक्टर क्षेत्रफलमध्ये ११ हजार २२९ हेक्टर अर्थात् ३० प्रतिशत मात्र धान रोपाइँ सकिएको छ । प्यूठानमा ६ हजार ५२५ हेक्टर क्षेत्रफलमध्ये ६ हजार ३२९ हेक्टर अर्थात् ९७ प्रतिशत रोपाइँ सकिएको छ ।

यसैगरी, रोल्पामा धान रोपाइँ हुने ४ हजार ६३८ हेक्टर क्षेत्रफलमध्ये ४ हजार ४५२ हेक्टर अर्थात् ९६ प्रतिशत रोपाइँ सकिएको छ । बाँकेमा धान उत्पादन हुने ३३ हजार हेक्टर क्षेत्रफलमध्ये १४ हजार ८५० हेक्टर अर्थात् ४५ प्रतिशत रोपाइँ सकिएको छ । बर्दियामा ४९ हजार ३३ हेक्टर क्षेत्रफलमध्ये ३६ हजार २८४ हेक्टर अर्थात् ७४ प्रतिशत रोपाइँ सकिएको निर्देशनालयका सूचना अधिकारी पौडेलले बताए ।

सबैभन्दा कम धानखेती हुने रुकुम पूर्वमा ९० प्रतिशत रोपाइँ सकिएको छ । धान रोपाइँ हुने एक हजार ४ सय १९ हेक्टरमध्ये एक हजार २७७ हेक्टर क्षेत्रफलमा रोपाइँ सकिएको छ ।

ढिलागरी मनसुन शुरु भएकाले असार सकिए पनि यस वर्ष अझै ३५ प्रतिशत खेतमा धान रोप्न बाँकी नै रहेको निर्देशनालयका प्रमुख रामप्रसाद पाण्डेले बताए । ‘लामो समयदेखिको खडेरीका कारण यो वर्ष देशैभर धान रोपाइँ ढिलो सुरु भएको थियो’ उनले भने, ‘केही ठाउँमा खडेरीकै कारण किसानले समयमै धानको बिउ राख्न नपाउँदा रोप्न ढिलाइ भएको हो ।’