कपिलवस्तुमा बढ्दो सवारी दुर्घटनाः एक वर्षमै ६० जनाले ज्यान गुमाए

दिपा महत, तौलिहवा ।

कपिलवस्तुमा सडक दुर्घटना भयाबह बन्दै भएको छ । जिल्ला प्रहरी कार्यालय कपिलवस्तुको तथ्यांक अनुसार चालु आर्थिक वर्ष २०८१। ८२ मा ३ सय ३३ वटा दुर्घटना भएका छन् जसमा ६० जनाले ज्यान गुमाएका छन् । दुर्घटनामा परी ३ सय २४ जना घाइते भएका छन भने २ सय १३ जनाको अवस्था गम्भीर छ ।

गत आर्थिक वर्ष भन्दा अहिले सवारी दुर्घटनाको संख्या ८३.९ प्रतिशतले बृद्धि भएको प्रहरी नायव उपरिक्षक मोहन मणि अधिकारीले जानकारी दिए । प्रहरीको तथ्यांक अनुसार पछिल्लो ३ वर्षमा ७ सय ५७ वटा सवारी दुर्घटना भएका छन् ।
आर्थिक वर्ष २०८०। ८१ मा १ सय ८१, २०७९। ८० मा एक सय ९ र २०७८। ७९ मा १ सय ३४ सवारी दुर्घटना भएका छन् ।

दुर्घटना न्यूनिकरणमा प्रहरीको नयाँ अभियान

सडक दुर्घटना बढ्न थाले पछि दुर्घटना न्यूनिकरणका लागि कपिलवस्तु प्रहरीले नँया प्रयास थालेको छ । दुर्घटना र यसबाट भैरहेको जनधनको क्षतीलाई न्यूनिकरण गर्दै ट्राफिक नियमलाई चुस्तदुरुस्त बनाउन भन्दै ट्राफिक नियम उल्लङ्घन गर्ने सवारीको नम्बर प्लेट स्पष्ट देखिएको भिडियो खिचेर आफुहरुलाई पठाउन आम नागरिक सबैमा आग्रह गरेको हो । जिल्ला प्रहरी कार्यालय कपिलवस्तुले ट्राफिक नियम उल्लङ्घन गरेका जुनसुकै सवारी साधनको पनि फोटो वा भिडियो खिचेर पठाउन आग्रह गरेको हो ।
जनता पनि बिना बर्दीको प्रहरी भएको भन्दै प्रहरी उपरिक्षक निरजन दत्त भट्टले ट्राफिक ब्यस्थापनलाई चुस्त बनाउन सहयोग गर्न आग्रह गरे ।
जनताले पठाएको भिडियो तथा फोटोका आधारमा उक्त सवारी साधनलाई कारवाही गरिने भन्दै सुचना दिने ब्यक्तीको परिचय भने गोप्य राखिने भट्टले बताए ।