पिपरा।
कपिलवस्तुको बाणगंगा नगरपालिका कोठी पिपरा अन्तर्गत मायादेवी साझेदारी वनबाट अवैध काठको ओसार पसार भएको पाइएको छ । विदामा पनि कार्यालय बसेका सव डिभिजन वन कार्यालय पिपराका प्रमुख मोहन मिश्राको संलग्नतामा अवैध काठ निकासी भएको हो ।
दशैं विदाको मौका छोपी यसरी अवैध धन्दा गर्न थालेको सुईको पाएपछि स्थानीय र उपभोक्ताले घेरा हालेर प्रहरीलाई बुझाएका थिए । आज विहान अष्टमीको दिन दशैको चहलपहलको मौका छोपेर कार्यालय प्रमुख मोहन मिश्राको निर्देशनमा काठको अवैध निकासी भएको स्रोतले जनायो ।
लु ३ त ६२९५ नम्बर को ट्याक्टरमा निकासी गर्दै गरेको अवस्थामा अवैध ७ थान सालका गोलिया प्रहरीलाई बुझाएको स्थानीय गोपाल पाण्डेले बताए । अन्य ७ गोलिया बनमै उठाउने तयारीमा रहेको बुझिएको छ ।
यस्तो छ अवैध धन्दा
लु ३ त ६२९५ नं को ट्याक्टरमा ल्याईएको उक्त काठ गत आर्थिक वर्षको वैशाख महिनामा कटान भएको अधिकृत मिश्र बताउछन् । सोही लटका अन्य काठ जेष्ठ र असारमा ठुवानी गरी घाटगद्दीमा संकलन भएको भएतापनि उक्त काठ जंगलमै छोडिनु र हाल विदाको समयमा विना चलानी प्रेवश अनुमती र चलानीपत्र विना वन प्रवेश गरि निकासी गर्नु रहस्यमय छ ।
यस विषयमा डिभिजन बन कार्यालय कपिलवस्तुका वन अधिकृत मदन ढुंगानाले सो लटको काठ घाटगद्दीमा नभेटिएपछी खोजतलास गर्न भनेको तर आज उठाउने विषयमा कुनै सुचना नभएको स्पष्ट पारे ।
मिश्राले म्याद थप विना संकलन र विना चलानी अन्दाजी सय क्यू फिट काठ दिन दहाडै निकासी गरि संकास्पद गतिविधि गरेको हुँदा छानविन गर्नुपर्ने स्थानीयहरु बताउँछन् । मिश्राले चलानी र वन प्रवेश पुर्जी विना काठ ल्याउनु गल्ती भएको स्वीकार गरेका छन् । काठ संकलनको लागि वन प्रवेश र ढुवानीका लागि डिभिजन वन कार्यालयबाट अनुमती र चलानी आदेश अनिवार्य हुन्छ । साथै साउनदेखि कार्तिकसम्म वन प्रवेश, कटान, संकलन र ढुवानी बन ऐन तथा कानुन विपरित हुन्छ ।
ईलाका प्रहरी कार्यालय पिपराका प्रमुख लोकेन्द्र जिसीले समुदायले नियन्त्रणमा लिई सूचनाका आधारमा प्रहरी पुगेर ल्याएको काठको आवश्यक अनुसन्धान गरि कानुनी प्रकृया अगाडी बढाउने काम भएको बताए । उक्त बरामद काठ बरामद मुचुल्का उठाई सम्वन्धित निकायमा पेश गर्ने प्रहरी निरिक्षक जिसीले बताए ।
२०८२ जेष्ठ ८ गते मायादेवी साझेदारी वनको सुधार कटान प्लट नं ६ बाट १४ थान काठको गोलिया मिश्राकै संलग्नतामा गाएव भएको श्रोतले बताउछ । सोही काठ मिलान गर्न अवैध धन्दा गरि मिश्राले यसबाट पुर्ती गर्न कानुन विपरित यो कदम उठाएको एक कर्मचारीले बताए ।
असुली धन्दामा लम्पट अधिकृत
सव डिभिजन बन कार्यालय पिपराको नेतृत्वमा मिश्रा आएपछी असुली धन्दामा लम्पट भएका हुन् । डिभिजन बन अर्न्तरगत ८ वटा सामुदायिक वन र मायादेवी साझेदारीमा वन व्यवस्थापन समिति रहेका छन् । ती समितिहरुमा आफू अनुकुल कार्ययोजना बनाउने, स्वीकृत गर्ने , प्रविधिक सहयोग र नियमनका नाममा समुहहरु मार्फत आर्थिक लाभ लिनेमा मिश्राको नाम अग्र पंक्तिमा आउछ । समूहका एक अध्यक्षले नाम नबताउने शर्तमा भने प्रति सामुदायिक वन सव डिभिजन कार्यालय र इन्धन, अतिथि खर्चका नाममा २ देखि ३ लाख उठाउने गरेको बताए । उक्त्त प्रस्ताव उपर पदाधिकारी असन्तुष्ट भएको मायादेवी अनलाइनलाई बताए ।
त्यसो त काठ कटान हुँदा प्रति सेप्टी १० देखि १५ रुपैयाका दरले उनैलाई छुट्याउनुपर्ने बाध्यता समेत भएको समूहका पदाधिकारीहरु बताउछन् । मिश्राको अवैध धन्दा यतिमै सिमित कहाँ छ र ?
समूहका टाचाँ नविकरणका नाममा भेटी नचढाई नविकरण नगर्ने भन्दै खुलेयाम रकम माग गर्ने गरेको समेत बनका जिम्मेवार तहमा बसेकाहरुले पट्क पट्क गुनासो गर्दै आएका थिए । बनको अन्य प्राविधिक कार्यमा समेत प्रमुखले नै आन्तरिक रुपमा निर्देशन दिएर आर्थिक लाभ लिएको समितीले बताए ।
प्रतिक्रिया