यस्ता हुन्छन् पित्तथैलीमा पत्थरीको लक्षणहरू

एजेन्सी ।
हिजो आज अधिकांश मानिसमा पत्थरीको समस्या देखिन थालेको छ । पत्थरी शरीरको फरक फरक हिस्सामा हुन सक्छ । यसमध्ये एक हो पित्तथैली । पित्तथैली कलेजोको तलपट्टि रहेको सानो अंग हो, जहाँ कलेजोले उत्पादन गर्ने पित्त जम्मा भएर बस्छ । चिकित्सकका अनुसार पित्तथैलीमा पत्थरी भए पनि धेरै मानिसमा सुरुवाती अवस्थामा कुनै लक्षण नदेखिन सक्छ ।

यस्तो अवस्थालाई साइलेंट गलब्लाडर स्टोन भनिन्छ । लक्षण नदेखिएका सबै पत्थरीमा तत्काल उपचार आवश्यक नपर्न सक्छ । तर पत्थरीले पित्त बग्ने नलीमा अवरोध पुर्‍याउन थालेमा समस्या गम्भीर हुन सक्छ । त्यसैले पित्तथैलीमा पत्थरी भएको थाहा भएमा सम्भावित लक्षणलाई बेवास्ता गर्नु हुँदैन ।

पेटको माथिल्लो दायाँ भागमा दुखाइः

पित्तथैलीको पत्थरीको सबैभन्दा सामान्य लक्षण पेटको माथिल्लो दायाँ भागमा दुख्नु हो । यस्तो दुखाइ अचानक सुरु हुन सक्छ र कतिपय अवस्थामा निकै तीव्र वा लगातार रहन सक्छ ।

पेटको माथिल्लो मध्य भागमा दुखाइः

कतिपय व्यक्तिमा दुखाइ पेटको माथिल्लो मध्य भागमा पनि महसुस हुन सक्छ । विशेषगरी धेरै चिल्लो वा तारेको खाना खाएपछि दुखाइ बढ्न सक्छ । यस्तो दुखाइ ढाड वा दायाँ काँधतर्फ समेत फैलिन सक्छ ।

दुखाइसँगै वाकवाकी र बान्ताः

पित्तथैलीमा पत्थरी हुँदा पेट दुख्नुका साथै वाकवाकी लाग्ने वा बान्ता हुने समस्या पनि देखिन सक्छ । यद्यपि पेट दुख्दैमा वा ग्यास तथा अपच हुँदैमा पित्तथैलीमा पत्थरी भएको निष्कर्ष निकाल्न मिल्दैन । यस्ता लक्षण अन्य धेरै कारणले पनि हुन सक्छन् ।

कहिले गम्भीर बन्न सक्छ पित्तथैलीको पत्थरी ?

पत्थरी पित्तनलीमा पुगेर त्यसलाई अवरुद्ध गरेमा अवस्था गम्भीर बन्न सक्छ । यस्तो अवस्थामा जन्डिस देखिन सक्छ । जन्डिस हुँदा छाला वा आँखाको सेतो भाग पहेँलो देखिन सक्छ । पिसाबको रंग सामान्यभन्दा गाढा हुन सक्छ भने कतिपय अवस्थामा दिसाको रंग पनि फिक्का देखिन सक्छ ।

यी लक्षण देखिए तत्काल देखाउनुपर्छ चिकित्सकलाई

पेट दुखाइसँगै निम्नमध्ये कुनै लक्षण देखिएमा ढिला नगरी चिकित्सकीय परामर्श लिनुपर्छः

• पेट दुखाइ धेरै घण्टासम्म लगातार रहनु वा पटक–पटक दोहोरिनु
  – ज्वरो आउनु र काम्नु
  – लगातार बान्ता हुनु
  – छाला वा आँखाको सेतो भाग पहेँलो हुनु
  – अत्यधिक वा असह्य पेट दुखाइ हुनु
• पित्तथैलीको पत्थरीका लक्षण पाचनसम्बन्धी अन्यसमस्यासँग मिल्दो हुन सक्छ । लक्षण मिल्यो भन्दैमा आफ्नो पित्तथैलीमा पत्थरी नै छ भनेर निष्कर्ष निकाल्नु हुँदैन । आवश्यक परे चिकित्सकले अल्ट्रासाउन्डलगायत परीक्षणमार्फत समस्या पहिचान गर्न सक्छन् ।