नारायण खनाल ।
तिमी नेपाली हौं र
म पनि नेपाली हुँ
तर तिमी नेपाली हुनु र
म नेपाली हुनुमा फरक रहेछ
तिमी देश लुछेर डकार्छौ
म आफू भोकभोकै पिसिएर
तिमीलाई डकार्न चाहिने
परिकार टकार्छु
तिमी भोट माग्छौ
म भोट दिन्छु
त्यही मैले दिएको
भोटले जितेपछि
तिमी ओछाएको रातो कार्पेटमा बस्छौ
म सिङ्गै धरती
ओछ्याएर बस्छु
तिमी सदनमा बसेर
बाघलाई काग बनाउंछौ र
कागलाई बाघ बनाउंछौ
सुकिलो देशमा दाग लगाउंछौ
हो त्यसैले त
तिमी नेपाली हुनु
र म नेपाली हुनुमा
फरक रहेछ
म स्वाभिमानको सगरमाथा बोक्छु
तिमी राष्ट्रको स्वाभिमान बेच्छौ
तिमी दुस्कर्म बढाउँछौ
तर म लाचार नबनेर
दुस्कर्मको विरोधमा जुटिरहन्छु
तिमी पनि नेपाली हौं
र म पनि नेपाली हुँ
तर तिमी नेपाली हुनु र
म नेपाली हुनुमा फरक रहेछ
म अरबमा हड्डी
पिन्छु र पाएको पैसाले
परिवारको भोक मेटाउँछु
बाकसमा लास बनेर
फर्कनु परे तिमीले दिएको
भिसाको गुन तिरेको सम्झन्छु
तिमी म र म जस्ता राष्ट्रका सन्तानको
अरबका खाडीमा खसेका
दुखका आँसु र पसिना संगालेर
आफ्नो प्यास मेट्छौ
म विदेशमा पसिना बगाउँदा पनि
दिलमा देश सजाउँछु
तिमी देश भित्र रहेर पनि
देश दुखाउँछौ
हो, त्यसैले त
तिमी नेपाली हुनु र
म नेपाली हुनुमा फरक रहेछ
म नेपाली भएकोमा गर्व गर्छु
तिमी आफू राक्षस जस्तै हुँदा पनि
इमानदार र सच्चा नेपाली जनतालाई
शासन गर्न पाउँदा गर्व गर्छौ
तिमी चेलिहरूको अस्मिता लुट्छौ
म चेलीहरूको सम्मान गर्छु
हो त्यसैले त
तिमी नेपाली हुनु र
म नेपाली हुनुमा फरक रहेछ
तिमी न्यायका पालुवा
परक्क निमोठेर, असत्य जिताउने
दुस्साहस गर्छौ
म सत्यको पक्षमा
आवाज बुलन्द पार्न जनता जगाउँछु
हो त्यसैले त
तिमी नेपाली हुनु र
म नेपाली हुनुमा फरक रहेछ
तिमी देश लुछेर डकार्छौ
म आफू भोकभोकै पिसिएर
तिमीलाई डकार्न चाहिने परिकार टकार्छु ।
प्रतिक्रिया