काठमाडौं ।
सत्तारूढ नेपाल कम्युनिस्ट पार्टी संसदीय दलका उपनेता सुवास नेम्वाङले उपसभामुख शिवमाया तुम्बाहाङ्फेले पदबाट राजीनामा दिनुपर्ने बताउनुभएको छ । ’संविधानमा नै सभामुख र उपसभामुख फरक दलको हुनुपर्ने व्यवस्था गरेको छ । जसका लागि उपसभामुखले राजीनामा दिनुपर्छ’ संविधानसभा अध्यक्षसमेत रहेका नेम्वाङले बिहीबार काठमाडौंमा भन्नुभयो, ’नेकपाले सभामुख पद लिनका लागि उपसभामुखले राजीनामा गर्नुपर्छ ।’
संसदमा नेकपाको झन्डै दुईतिहाइ बहुमत भएको अवस्थामा संसदको नेतृत्व सभामुखको पद अर्को पार्टीलाई दिन नसकिने पनि उपनेता नेम्वाङले बताउनुभयो । उपसभामुख तुम्बाहाम्फेले संसदको हिउँदे अधिवेशन बोलाउनु पहिले नै राजीनामा गर्नुपर्ने नेम्वाङले बताउनुभयो । उपसभामुखले सभामुखलाई सम्बोधन गरेर राजीनामा दिएर अधिवेशन आह्वान भएर नयाँ सभामुख निर्वाचित नहुँदासम्म संसद बैठक ज्येष्ठ सदस्यले चलाउने उनले जानकारी दिनुभयो ।
संसद सचिवालयमा कार्यरत कर्मचारीमाथि यौन दुर्व्यवहार अभियोगमा राजीनामा दिएर सभामुख कृष्णबहादुर महरा पुर्पक्षका लागि डिल्ली बजार जेलमा हुनुहुन्छ । नेकपाले सभामुख कसलाई बनाउने भन्ने निर्णय गरिसकेको छैन । नेकपामा सभामुख हुन उपसभामुख तुम्बाहाम्फे, उपनेता नेम्वाङ, सचेतक देवप्रसाद गुरुङ, सांसदहरू अग्नि सापकोटा, पम्फा भुसाल र लेखराज भट्टले चासो राख्नुभएको छ ।
प्रतिक्रिया