चाडवाडमा कसरी खानपिनमा ध्यान दिने ? विज्ञले दिए सुझाव


काठमाडौं ।
कोभिड–१९ (कोरोना भाइरस) को सङ्क्रमणबाट जोगिन दैनिक गतिविधिमा सुधार गर्दै खानपिनमा ध्यान दिनुपर्नेमा विज्ञहरुले जोड दिएका छन् ।

पछिल्लो समय सङ्क्रमण बढ्दै गएको अवस्थामा रोगसँग लड्ने क्षमताको विकास गर्नु नै उत्तम विकल्प भएको विज्ञहरुले बताएका छन् । त्यसका लागि दैनिक गतिविधि र खानपिनमा नै ध्यान दिनुपर्नेमा उनीहरुले जोड दिएका छन् ।

आयुर्वेदिक चिकित्सक डाक्टर ऋषिराम कोइरालाले खाने कुराहरुमा विशेष ध्यान दिनुपर्ने बताउनुभयो । उहाँका अनुसार तेलमा तारेर बनाइएको परिकारहरु कम खानुपर्ने छ । बजारमा पाइने चिल्लो, सुकिलो र सफा देखिने खाद्य वस्तुहरुमा बढी विषाक्त प्रयोग भएको हुन सक्ने भएकाले त्यस्ता वस्तुहरुको प्रयोग गर्दा ख्याल गर्नसमेत उहाँले सुझाव दिनुभएको छ ।

त्यस्तै ब्रोइलर कुखुराको मासु धेरै नखानसमेत उहाँले आग्रह गर्नुभएको छ । ब्रोइलर कुखुरामा धेरै एन्टिबायोटिक प्रयोग भएको र जेनेटिक मोडिफाइडसमेत भएकाले बोइलर कुखुराको मासुको कम प्रयोग गर्नुपर्ने उहाँको भनाइ छ ।

त्यस्तै खसीबोकाको उपभोग पनि कम गर्न उहाँको सुझाव छ । कोकाकोला, फेन्टालगायतका पेय पदार्थको कम प्रयोग गर्न उहाँले आग्रह गर्नुभयो । दिनको एक दुई वटा कागतीको सेवन गर्ने, पुदिना, तिललगायतका वस्तुबाट बनाइएको अचार तथा चटनी खाने बानीले रोगव्याधी कम गराउने उहाँले बताउनुभयो ।

त्यस्तै धेरै प्रकारका मल प्रयोग भएका सागसब्जी, तरकारीहरुको प्रयोग नगर्नसमेत उहाँले सुझाव दिनुभएको छ । सादा खाना खान र शरीरभित्र कुनै पनि प्रकारको भार नपर्ने गरी खानपिन गर्न उहाँको सुझाव छ । शुद्ध पानी धेरै पिउने, गुर्जो, उमारेको जमरा, कागतीलगायतको सेवन गर्नु उपयुक्त हुने पनि उहाँले बताउनुभयो ।

त्यस बाहेक नियमित व्यायाम गर्दा समेत शरीरमा फाइदा पुग्ने उहाँको भनाइ छ । योग, खानपिन, आयुर्वेदका जडीबुटी र मनोविज्ञानका पक्षहरुमा सबैभन्दा धेरै ध्यान दिनुपर्नेमा उहाँले जोड दिनुभयो ।

भाइरोलोजिस्ट डाक्टर बाबुराम मरासिनीले दशैँको बेला सहर बजारबाट आफ्नो घरमा जाँदा विशेष सावधानी अपनाउनुपर्ने बताउनुभयो । दशैँमा घर नजानभन्दा पनि घर गएपछि

सङ्क्रमणबाट जोगिनका लागि विभिन्न उपायहरु अपनाउन सकिने उहाँले बताउनुभयो । घरमा गएपछि परिवारका सदस्यसँग घुलमिल हुन भन्दा अलग्गै बस्नुपर्नेमा जोड दिनुभयो । खाना खाँदा दुरी कायम गर्ने, दशैँमा टीका लगाउँदा खुला ठाउँमा लगाउने, भिडभाड नगर्ने हो भने रोग लाग्नबाट बच्न र बचाउन सकिने डा. मरासिनीको भनाइ छ ।

मायादेवी अनलाइन डटकम कपिलवस्तुको पहिलो अनलाइन डिजिटल पत्रिका हो । वि.सं. २०७४ साउन ७ गते देखि औपचारिक रुपमा सञ्चालनमा रहेको यो अनलाइनले मुलतः स्थानीय, प्रदेश, देश तथा विदेशका समाचार प्रकाशन गर्दै आएको छ । साथमा हामीले विचारहरु पनि पस्कने गर्छौ । तपाईको आलोचनात्मक सुझाव हाम्रा लागि सधै ग्रह्य छ । हामीलाई पछ्याउनुभएकोमा धन्यवाद ।

प्रतिक्रिया दिनुहोस