काठमाडौं ।
स्थानीय निकाय निर्वाचनलगायत विषयमा विचार–विमर्श गर्न सत्ता साझेदार दलको बैठक प्रधानमन्त्री निवास बालुवाटारमा फेरि सुरु भएको छ ।
शनिबार बिहानको बैठक निष्कर्षमा पुग्न नसकेपछि अपराह्नका निम्ति पुनः निर्धारण गरिएको बैठकमा राष्ट्रिय जनमोर्चाका प्रतिनिधिबाहेक चारवटै राजनीतिक पार्टीका शीर्ष नेताहरूको उपस्थिति रहेको बताइएको छ। पार्टीको काम विशेषले काठमाडौंबाहिर रहेकाले जनमोर्चाका प्रतिनिधि बैठकमा अनुपस्थित भएका हुन्।
आजको गठबन्धन बैठकले सरकारलाई स्थानीय निर्वाचनको मिति सिफारिस गर्न सक्ने बताइएको छ। गठबन्धनले सिफारिस गरेको मितिमा निर्वाचन आयोगसँग परामर्श गरी सरकारले निर्वाचनको मिति तोक्नेछ।
निर्वाचन आयोगले आगामी वैशाख १४ र २२ गते स्थानीय तहको निर्वाचनको मिति तोक्न सरकारलाई दबाब दिइरहेको बेलामा सत्ता गठबन्धन भने स्थानीय तहको ऐन र संविधान बाझिएको विषयमा बहस भइरहेको छ।
आयोगको सिफारिसअनुसार नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधवकुमार नेपाल पनि वैशाखमै निर्वाचन गर्न सकारात्मक देखिएकाले आजको बैठकले मिति तय गर्नसक्ने आँकलन भइरहेको छ। पार्टी र गठबन्धनभित्रको चर्को दबाब झेलिरहेका प्रधानमन्त्री शेरबहादुर देउवा अहिले अन्योलमा छन्।
प्रतिक्रिया