८ फाल्गुन २०८०, मंगलबार | Tue Feb 20 2024

नेपाल र चीनका बीचमा कृषि प्रविधि विकास र सिपको आदानप्रदानमा सहमति



काठमाडौं ।
नेपाल र चीन बीच कृषिसँग सम्बन्धित प्रविधि विकास तथा सिपको आदानप्रदान हुने भएको छ । दुई देशका कृषक एवं कृषिको विकासका लागि विकास गरिएका प्रविधिहरु प्रदर्शन, हस्तानान्तरण तथा प्रबद्र्धन गर्ने सहमती भएको छ ।

नेपालको नेपाल कृषि अनुसन्धान परिषद (नार्क) र चीनको सिचुवान एकेडमी अफ एग्रीकल्चर साइन्स (सास) का बीचमा यस्तो सहमती भएको छ । नार्कका कार्यकारी निर्देशक डा. ध्रुवराज भट्टराई र सासका उपाध्यक्ष डा. लेओ योङ्गहङ्गका बीचमा प्रविधि विकास र सिप आदानप्रदान गर्ने बिषयलाई कार्यान्वयनमा तत्काल ल्याउँन आज सहमती भएको हो । ललितपुरको खुमलटार स्थित नार्कको केन्द्रीय कार्यायलमा नार्क र सासको उच्च स्तरीय प्रतिनिधि मण्डलका बीचमा भेटघाट एवं छलफल भएको छ ।

सोही क्रममा अनुसन्धानका उपलब्धिहरु आदान प्रदान गरी कृषिको बिकासमा सहयोग गर्ने छलफल भएको नार्कका कार्यकारी निर्देशक डा. भट्टराईले बताए । ‘एकअर्काको अनुसन्धानको बारेमा बुझ्दै कृषि तथा कृषकको बिकासको बारेमा छलफल गरेर उच्चदरको गुणस्तरीय उत्पादन बढाउँदै जाने बारेमा हामीले छलफल गर्यौ’ नार्कका कार्यकारी निर्देशक डा. भट्टराईले भने ।

सोही क्रममा सासका उपाध्यक्ष डा.लेओले नेपाली अनुसन्धानकर्ता र प्राविधिकलाई उच्चस्तरीय कृषि प्रविधि सम्बन्धि तालिम सासले छिटैनै दिने प्रतिबद्धता व्यक्त गरेका छन् । ‘हामी नेपाल र चीनको कृषि क्षेत्रमा लामो समयसम्म सहकार्य गर्न चाहेका छौं । सोही क्रममा हामी नेपाल भ्रमणमा आएका छौं । यहाँ आएर बिभिन्न बालीको खेती कसरी भईरहेको छ भन्ने देख्यौं’ सासका उपाध्यक्ष डा. लेओले भने । केही दिनभित्रैमा सासले नेपाली अनुसन्धानकर्तालाई चीनमा लगेर मकै र सकरखण्डको उत्पादनका साथै प्रविधिको बारेमा तालिम दिन लागेको छ ।

ती अनुसन्धानकर्ताहरु नेपाल आएर देशका बिभिन्न क्षेत्रममा रहेका कृषकसंग आफ्नो अनुभव साटासाट गर्नेछन् । नार्कका योजना महाशाखा प्रमुख डा।टेकप्रसाद गोतामेले चीनबाट उन्नत प्रविधि तालिम लिएका नेपाली अनुसन्धानकर्ताहरुले पछि नेपालका किसानलाई तालिम मार्फत सिकाउने बताए ।

हालै चीनको सिचुवानमा आयोजना गरिएको बृहत बैठकबाट नार्कका कार्यकारी निर्देशक डा. भट्टराईलाई इन्टरनेशनल माउन्टेन एग्रीकल्चर साइन्स एण्ड टेक्नोलोजी इनोभेसन एलाइन्सको उपाध्यक्षमा निर्बाचित गरिएको थियो । चीनको सासका उपाध्यक्ष डा. लेओ नेतृत्वको नेपाल भ्रमण पनि त्यसैको निरन्तरता हो । सासका उपाध्यक्ष डा. लेओको नेतृत्वमा तीन दिने नेपाल भ्रमणमा आएको टोलीमा सु यी, लि झिवा, ज्याङ्ग जन, याङ्ग सोङटाओ, ल्यू यूची लगायतका रहेका छन् ।

प्रकाशित मिति : ५ श्रावण २०८० शुक्रबार ००:००  २ : ५० बजे