‘माओवादी–एकीकृत समाजवादी एकता हानिकारक हुन सक्छ’

काठमाडौँ ।
नेकपा (माओवादी केन्द्र) का नेता जनार्दन शर्माले नेकपा (एकीकृत समाजवादी) सँग प्रस्तावित पार्टी एकता प्रक्रिया तत्काल रोक्न माग गरेका छन् ।
शनिबार पार्टी केन्द्रीय कार्यालय पेरिसडाँडामा जारी महाधिवेशन आयोजक समितिको सचिवालय बैठकमा आफ्ना विचार राख्दै शर्माले हतारमा गरिने एकताले कम्युनिस्ट आन्दोलनलाई कमजोर बनाउने र व्यक्तिगत स्वार्थ पूरा गर्ने मात्रै हुने बताएका हुन् ।

शर्माले वैचारिक स्पष्टता, विगतको समीक्षा र सांगठनिक तयारीबिनाको एकता ुदीर्घकालीन दृष्टिले हानिकारकु हुने तर्क प्रस्तुत गरे । उनले जनयुद्धको मर्म, संविधानको भावना र जनआकांक्षा अनुरूप समाजवादको आधार तयार पार्नुको सट्टा शीर्ष नेताहरू सुखसुविधा, पद, चाकडी र सत्ता मोहमा अल्झिँदा पार्टीको वैचारिक आधार र जनपक्षीय चरित्र कमजोर बनेको आरोप लगाए ।

यसैको परिणामस्वरुप भदौ २३ गते युवाहरूको जेनजी आन्दोलन विस्फोटन भएको उनको ठहर छ, जसले प्रमुख दलका शीर्ष नेतृत्वमाथि गम्भीर प्रश्न उठायो । उनले पार्टीले जनाधार गुमाएको र विचार विपरीत गठबन्धनमार्फत अस्तित्व बचाउन बाध्य भएको उल्लेख गरे । माओवादी विचार र पहिचानलाई परित्याग गर्दै बहुदलीय जनवादका आधारभूत मान्यतासँग आत्मसमर्पण गर्ने प्रवृत्तिले पार्टीको आधारभूत चरित्रलाई पूर्णरूपमा समाप्त पार्ने उनको भनाइ छ ।

शर्माले महाधिवेशनमार्फत वैचारिक बहस र प्रतिस्पर्धामूलक नेतृत्व निर्माणको प्रक्रिया अवरुद्ध पार्दै गरिएको एकता प्रस्तावलाई वैचारिक छलफलबाट भाग्ने प्रयासका रूपमा चित्रित गरे । उनले सहिद, बेपत्ता र घाइते योद्धाहरूको सपना र त्यागलाई बेवास्ता गर्दै गरिने यस्तो एकता प्रक्रियाले पार्टीलाई बलियो नभई अझ कमजोर बनाउने र कम्युनिस्ट आन्दोलनलाई विघटनको दिशामा धकेल्ने चेतावनी दिए ।

उनले तत्काल एकता प्रक्रिया स्थगित गरी पार्टीको समग्र पुनर्गठन, वैचारिक स्पष्टता र जनपक्षीय दिशामा अघि बढ्न गम्भीरतापूर्वक आह्वान गरेका छन् ।