अस्ताउँदो सूर्यलाई अर्घ दिएर छठ पर्वको सन्ध्या पूजा गरियो

महोत्तरी, कात्तिक ९। मिथिलाञ्चलको सबैभन्दा निष्ठा एवं श्रद्धापुर्वक मनाईने महान पर्व छठको सन्ध्या पूजा बुधबार बेलुका अस्ताउँदो सूर्यलाई अर्घ दिएर मनाइएको छ । घरघरमा नियम एवं निष्ठापूर्वक मनाइने छठ पर्व अन्तर्गत मुख्य पूजा सझिया अर्घ जलाशयमा गएर व्रतालुहरुले एकैसाथ सामुहिक रुपमा अर्घ अर्पण गरेका छन् ।
महोत्तरीको गौशालास्थित माण्डवी गंगा, बर्दिबासस्थित रातु नदी, जलेश्वरस्थित भार्गवसर पोखरी, वलवास्थित जंघानदीलगायतका पोखरी तथा इनारमा व्रतालुहरुले विभिन्न किसिमको छठी मईयाको लोकगीत गाएर पर्व मनाईदै छ ।
नजिकै रहेको जलाशयमा बनाइएको घाटमा विभिन्न किसिमको पूजा प्रसादको रुपमा ठेकुवा, भुसवा, नरिवल, उखु, फलफूललगायतको पूजा सामग्री घाटमा लगेर सूर्य भगवान एवं छठी मातालाई अर्पण गरेका छन् ।