कार्यकाल सकिएपछि झोला बोकेर हिँडे डेनिस प्रधानमन्त्री

कोपनहेगन ।
नेपालमा उच्च पदस्थ व्यक्तित्वको भड्किलो जीवनशैली बारम्बार आलोचित हुने गरेको छ ।
राष्ट्रपति, प्रधानमन्त्री तथा अन्य उच्च पदस्थ व्यक्तिहरुको सवारीका कारण मानिसहरुले सडकमा सास्ती खेप्दै आएका छन् भने उच्च पदस्थ व्यक्तिहरु विदेश जाने बेला अन्तर्राष्ट्रिय विमानस्थलमा विमानको उडान र अवतरण समेत अवरुद्ध हुँदै आएको छ । सोही कारण नेपालका उच्च पदमा आसिन व्यक्तित्वहरु आलोचनाको पात्र बन्ने गरेका छन् ।

अर्कोतर्फ युरोपेली खासगरी नर्डिक मुलुकका उच्च पदस्थ व्यक्तित्वहरुको जीवनशैली निकै सामान्य रहने गरेको छ । प्रधानमन्त्री, मन्त्रीहरुको साधारण जीवनशैलीलाई विश्वभर प्रसंशा गरिन्छ । प्रधानमन्त्रीलाई बाटोमा साइकल चलाइरहेको वा सार्वजनिक सवारीमा यात्रा गरिरहेको सामान्य मानिन्छ ।

यस्तै उदाहरण दिएका छन्, डेनमार्कका प्रधानमन्त्री लार्स रोकी रास्मुसेनले । प्रधानमन्त्री रास्मुसेनले आफ्नो प्रधानमन्त्रीको कार्यकाल पुरा गरी एउटा ब्याग बोकेर प्रधानमन्त्री कार्यालयबाट बाहिरिँदै गरेको तस्बीर अहिले सामाजिक सञ्जालमा भाइरल भइरहेको छ ।
४ वर्षअघि प्रधानमन्त्रीमा निर्वाचित भएका रास्मुसेनले आफ्नो कार्यकाल सकिएकै दिन सामान्य झोला बोकेर प्रधानमन्त्री कार्यालयबाट बाहिरएको तस्बीर सामाजिक सञ्जालमा भाइरल भएको हो ।
मुलुकका २५ औं प्रधानमन्त्री रास्मुसेनले सामाजिक सञ्जाल फेसबुकमा उक्त तस्बीर अपलोड गरेका हुन् । तस्बीरमा उनी कुनै सुरक्षा दस्ता बाहेक सुटमा सामान्य झोला बोकेर कार्यालयबाट बाहिरिएको देखिन्छ ।

उनले आफ्नो प्रधानमन्त्रीकालमा सहयोग गर्ने सबैलाई धन्यवाद समेत दिएका छन् । उनले प्रधानमन्त्री बनेर डेनिस जनताको सेवा गर्नु आफ्ना लागि सौभाग्य भएको समेत जनाएका छन् ।

डेनमार्कको नयाँ प्रधानमन्त्रीमा भने सोसल डेमोक्रेटिक पार्टीका तर्फबाट मेट फ्रेडरिकसन नियुक्त भएकी छिन् । उनले अर्को ४ वर्षसम्म डेनमार्कको प्रधानमन्त्रीका रुपमा जिम्मेवारी सम्हाल्नेछिन् ।