ओलीको रिटमा सक्कल फाइल मगाउन सर्वोच्चद्धारा आदेश

काठमाडौं ।
नेकपा (एमाले) ले कारबाही गरेका १४ सांसदको पद खारेजीसम्बन्धी रिटमाथि सर्वोच्च अदालतले सक्कल फाइल मगाउन आदेश दिएको छ।

सर्वोच्च अदालतका न्यायाधीश दीपककुमार कार्की र डा कुमार चुडालको संयुक्त इजलासले निर्वाचन आयोग र संसद सचिवालयलाई सक्कल फाइन मगाउन आदेश दिएको सर्वोच्च अदालतका सञ्चार विज्ञ किशोर पौडेलले जानकारी दिए।

सोमबार सुनुवाइ नसकिएपछि हेर्दाहेर्दैमा आजका लागि राखिएको थियो। एमाले अध्यक्ष केपी शर्मा ओलीले पार्टीले कारबाही सिफारिस गरेका माधवकुमार नेपालसहितका १४ सांसदलाई सभामुखले कारबाही नगरेको भन्दै सभामुख अग्निप्रसाद सापकोटा, निर्वाचन आयोग र लुम्बिनी प्रदेशका सभामुखलाई विपक्षी बनाएर रिट दायर गरेका थिए।

यसअघि न्यायाधीश कार्की र मीरा खड्काको संयुक्त इजलासमा गत भदौ २८ गते पेसी तोकिए पनि ‘हेर्न नभ्याइने’ सूचीमा परेको थियो।