वडालाई नमुना बनाउन मेरो उम्मेद्वारीः छवि रेश्मी

मायादेवी अनलाइन, वाणगंगा ।
बैशाख ३० गते हुने आसन्न स्थानीय तहको निर्वाचनमा पार्टीले टिकट दिएसंगै वडाको समृद्धिका लागि वडाध्यक्षको उम्मेद्वारी रहेको बताउदै मतदाता भेटघाट तथा घरदैलो कार्यक्रममा ब्यस्त छवि रेश्मी मतदाताको आशिर्वाद लिदै घरघरमा पुग्नुभएको छ ।

युवा वर्ग मात्र हैन ज्येष्ठ नागरिकहरुको सर्वाधिक रोजाईमा परि सबैको मन जित्दै मतदाता भेटघाटमा ब्यस्त छबि रेश्मी मगर वडाध्यक्ष भई वडालाई नमुना बनाउने अठोटका साथ अगाडि बढ्नुभएको छ । नेकपा एमालेको तर्फबाट कपिलवस्तुको बाणगंगा नगरपालिकाको सुन्दरनगरी वडा नं. ४ का वडाध्यक्ष पदका उम्मेद्वार रेश्मी युवा वर्गहरुको बीचमा लोकप्रिय नेताको रुपमा चिनिनुहुन्छ ।

लगातार १४ बर्ष सम्म पार्टी जिल्ला कमिटी सदस्य रहदै विभिन्न जिम्मेवारी सम्हाल्दै राजनीतिक तथा सामाजिक क्षेत्रमा होमिदै आउनुभएका रेश्मी सामाजिक संघ संस्थामा आवद्ध हुनुहुन्छ । २०६२÷६३ को जनआन्दोलनको युवा परिचालन समितिको संयोजक भई अप्ठ्यारो परिस्थितीको सामना गर्दै विभिन्न अनुभवहरुले बटुल्नुभएका रेश्मीलाई उम्मेद्वार बनाएकोमा मतदाताहरुले खुसी व्यक्त गरेका छन् ।

जिल्ला खेलकुद विकास समितिको अध्यक्ष हुंदा ७७ वटै जिल्ला मध्ये उत्कृष्ट अवार्ड पाउन सफल, नेपाल वन पैदावार उद्योग व्यवसायी संघ पुर्व जिल्ला महासचिव, नेपाल घरेलु तथा साना उद्योग महासंघ जिल्ला पूर्व वरिष्ठ उपाध्यक्ष, कपिलवस्तु जेसीजको पुर्व सचिव भई विभिन्न जिम्मेवारी सफलतापुर्वक पुरा गरेको अनुभव रेश्मीसंग छ ।

कपिलवस्तु उद्योग वाणिज्य संघको सदस्य, सचिव हुंदै लोकप्रिय मतका साथ बरिष्ठ उपाध्यक्षको जिम्मेवारी सम्हाल्दै यस क्षेत्रका उद्योगी व्यवसायीहरुको हक हितमा प्राथमिकताका साथ लागिरहनुभएको छ ।

वडाध्यक्षमा निर्वाचित भएपछि विशेष गरी वडाको समग्र विकासमा युवाहरुलाई नेतृत्वमा ल्याउन र बाणगंगाको मुटु चारनम्बर क्षेत्रको मुहार फेर्ने प्रमुख लक्ष्य रहेको बताउनुभयो । वडाको बाटोघाटो, सडक कालोपत्रे, शिक्षा, स्वास्थ्य, कृषि, रोजगार, युवालाई अवसर, महिलालाई आत्मनिर्भर बनाई भौतिक विकाससंगै समग्र सामाजिक रुपान्तरणमा आफ्नो अहम भुमिका रहने प्रतिवद्धता व्यक्त गर्नुभयो ।

वडाध्यक्षका उम्मेद्वार रेश्मीले बाणगंगा नगरपालिका वडा नं. ४ का गरिव, विपन्न, महिला, वालवालिका, ज्येष्ठ नागरिक लगायत सबैलाई समावेश गरि वडाका समग्र विकासका काम अगाडि बढाउदै लैजाने र युवा स्वरोजगारलाई विशेष ध्यान दिने उहाँले प्रतिवद्धता व्यक्त गर्नुभयो । रेश्मीले निर्वाचनका बेला दलको चुनाव चिन्ह लिएर आएपनि वडाध्यक्षमा निर्वाचित भएपछि सम्पुर्ण वडावासीको आवश्यकता र माग अनुसार कार्यहरु सञ्चालन गर्नेमा जोड दिनुभयो ।