हेटौंडा ।
वाग्मती प्रदेशका मुख्यमन्त्री राजेन्द्रप्रसाद पाण्डेले जनवादी गीतहरूले नै आफू मुख्यमन्त्री भएको बताएका छन् ।
प्रगतिशील लेखक सङ्घ मकवानपुरको आयोजनामा बुधबार हेटौँडामा भएको ‘जीवन शर्मा एकल साँझ’ कार्यक्रममा उनले यस्तो बताएका हुन् ।
मुख्यमन्त्री पाण्डेले कम्युनिस्टले जनता जगाउनेक्रममा जनवादी गीतको प्रयोग गरिएको र यही गीतले जनता जाग्दै व्यवस्था परिवर्तनसम्मको अवस्था सिर्जना हुँदा सोही क्रममा आफू मुख्यमन्त्री भएको जनाए ।
जनताको वास्तविकता बोक्ने गरेका जनवादी गीतले सामाजिक र सांस्कृतिक क्रान्ति भएको उनको भनाइ छ । सोही प्रेरणाका आधारमा कम्युनिस्ट नेता ठाउँमा पुग्दा गर्ने रहेछन् भन्ने विश्वास जनतालाई दिलाउन समाजवादी वडा कार्यक्रमको थालनी गर्न लागेकोसमेत उनले बताए ।
प्रदेश सरकारले समाजमा पिछडिएकाका लागि छानाको व्यवस्था गरिदिने बताउँदै उनले साउनदेखि नै वनकरियाको घर बनाउन सुरु गरिने जानकारी दिए ।
आजको एकल साँझ चार दशकभन्दा लामो समयदेखि अनवरतरूपमा जनताका पक्षमा गीत गाउँदै आएका जीवन शर्माको हेटौँडामै पहिलो एकल गायन प्रस्तुति भएको हो ।
शर्माले ‘सिमली छायाँमा बसी भरिया लामो सास फेरेको’ गीत गाउँदै मुख्यमन्त्री पाण्डेसहित सहभागी प्रदेशसभा सदस्य, निर्वाचित जनप्रतिनिधि र साहित्यकारलाई आफूसँगै नचाएका थिए । दर्जनौँ गीत प्रस्तुत गर्दै गायक शर्माले ‘झरनाको चिसो पानी’, ‘चाहिँदैन मलाई सिसाको महल’लगायतका गीत प्रस्तुत गरे । रासस
प्रतिक्रिया