सेवा विस्तार गर्दै पिपरा अस्पताल : पहिलो पटक ‘आङ खस्ने’ रोगको सफल शल्यक्रिया

बाणगंगा ।

कपिलवस्तुको बाणगंगा नगरपालिका–२ मा अवस्थित पिपरा अस्पतालले पहिलो पटक महिलाको जटिल ‘भजाइनल हिष्टेक्टोमी विथ पेल्भिक फ्लोर रिपेयर’ शल्यक्रिया सफलतापूर्वक सम्पन्न गरेको छ।
वाणगंगा–९ की एक महिलाको विहीबार गरिएको यो अप्रेसनले अस्पतालको सेवा विस्तारमा नयाँ कामको सुरुवात गरेको छ। महिला तथा प्रसूति रोग विशेषज्ञ डा. जागृति खनाल र एनेस्थेसिया विशेषज्ञ डा. सुमन श्रेष्ठको दक्ष टिमले संयुक्तरूपमा शल्यक्रिया सम्पन्न गरेका हुन्।

उल्लेखनीय कुरा के हो भने, यो सेवा वाणगंगा नगरपालिकाको सहयोगमा पूर्ण निःशुल्क रूपमा प्रदान गरिएको हो। शल्यक्रिया पश्चात बिरामीको अवस्था सामान्य रहेको र स्वास्थ्यमा क्रमिक सुधार देखिएको अस्पताल प्रमुख डा. सरस्वती भट्टराईले जानकारी दिइन् । यसअघि पिपरा अस्पतालमा यस्ता जटिल शल्यक्रिया नभएको हुँदा, स्थानीय बासिन्दा यो सेवाबाट निकै उत्साहित भएका छन्।

वाणगंगा नगरपालिकाका मेयर चक्रपाणी अर्यालले यस किसिमका जनमुखी सेवा अझै विस्तार गर्ने प्रतिबद्धता जनाउँदै आगामी दिनमा स्वास्थ्य क्षेत्रमा थप गुणस्तरीय सेवा पुर्‍याउने आश्वासन दिए । आगामी वर्ष अस्पतालको पूर्वाधार विकास र नयाँ प्रविधीमा जोड दिएर थप विशेषज्ञ सेवा दिने योजना रहेको नगर प्रमुख अर्यालले बताउनुभयो । नगरपालिकाको लगानीमा संचालन गरीएको पिपरा अस्पतालकाे अपरेशन सेवा विस्तार भएसंगै विरामीको चाप समेत बढेको छ ।